Бүгүн, 13-ноябрда Кыргыз Республикасынын Президенти Садыр Жапаров Талас облусундагы “Баластан” балдар оюн-зоок борборунун курулушуна мезгил кутусун салды.
Иш-чаранын жүрүшүндө Курулуш, архитектура жана турак жай-коммуналдык чарба министри Нурдан Орунтаев курулуш иштери боюнча маалымат берип, объект менен тааныштырды.
Садыр Жапаров өз
сөзүндө мамлекеттин башкы максаты – ар бир балага татыктуу балалык тартуулоо
экенин өзгөчө белгиледи. Балдар бейкапар ойноп, ээн-эркин өскөн чөйрөдө гана өз
алдынча ой жүгүртүүсү калыптанып, акыл-эси, руханий дүйнөсү, чыгармачылыгы
жакшы өнүгөт.
“Ошондуктан бул борбор, буюрса, жөн эле оюн-зоок жайы эмес, таалим-тарбиянын, өнүгүүнүн жана кубанычтын борбору болуп калат”, - деди Президент.
Жалпы аянты 6,5
гектарды түзгөн бул комплекс 9 корпустан туруп, шаардын маданий жана
экономикалык борборуна айланат.
Долбоорго ылайык, “Баластан” борборунда аттракциондор, ден соолугунун мүмкүнчүлүгү чектелген балдар үчүн атайын оюн зоналары, заманбап кинотеатр, конгресс-зал жана коомдук тамактануу жайлары курулат. Объекттин курулушу 200дөн ашуун жаңы жумуш орундарын түзөт.
Белгилей кетсек,
мындай долбоор Талас облусунун тарыхында биринчи жолу курулуп жаткан ири
оюн-зоок борбору болуп саналат. 1991-жылдан бери каралбай калган эски “Жеңиш”
паркы эми жергиликтүү тургундар үчүн келечектин реалдуу объектиси аталып,
“Баластан” оюн-зоок борборуна айланат.
